شرح إعدادات الهوتسبوت: الجزء الثاني 📶
إعدادات الهوتسبوت المتقدمة في المايكروتك | MikroTik Hotspot Setup
في الجزء الأول شغّلنا الهوتسبوت وعملنا أول مستخدم. في الجزء ده هنكمّل على الإعدادات اللي بتحتاجها في الشغل الفعلي: شكل صفحة الدخول، سرعة المستخدمين، الدخول بالماك، واستثناء أجهزة أو مواقع من تسجيل الدخول.
في المقال ده هنتعرف على:
- تغيير صفحة الدخول
- السماح بمواقع من غير تسجيل دخول (Walled Garden)
- استثناء أو حظر جهاز (IP Bindings)
- تحديد السرعة وعدد الأجهزة لكل حساب
- تحديد وقت وكمية الاستخدام
- طرق تسجيل الدخول: Cookie و MAC و Trial
- فيديو شرح عملي
تغيير صفحة الدخول
صفحات الهوتسبوت موجودة على الراوتر نفسه في Files جوه مجلد hotspot، وأهمها login.html (صفحة الدخول) و status.html (صفحة الحالة).
- افتح Files واسحب مجلد hotspot على جهازك، واحتفظ بنسخة منه قبل أي تعديل.
- عدّل login.html بأي محرر نصوص، أو غيّر اللوجو من مجلد img.
- لو عايز تصميم جاهز، فيه قوالب مجانية على موقع mikrotikthemes.airpoint.club، ومنه تقدر تصمم صفحتك بأداة MakerTik وتكتب العناوين بالعربي.
- ارفع الملفات على الراوتر مكان القديمة، وافتح صفحة الدخول عشان تشوف الشكل الجديد.
السماح بمواقع من غير تسجيل دخول (Walled Garden)
الـ Walled Garden بيسمح بفتح مواقع معينة قبل تسجيل الدخول، زي موقع الشبكة أو صفحة الدفع.
- من IP > Hotspot > Walled Garden اضغط + واكتب الموقع في Dst. Host، واختار allow من Action.
- تبويب Walled Garden IP List بيعمل نفس الفكرة لكن بالـ IP والبروتوكول والبورت.
/ip hotspot walled-garden add dst-host=www.wikipedia.org action=allow
استثناء أو حظر جهاز (IP Bindings)
من تبويب IP Bindings تقدر تتحكم في جهاز معيّن بالـ MAC Address أو الـ IP بتاعه. وفيه 3 أنواع:
- bypassed: الجهاز يستخدم الإنترنت من غير صفحة دخول. مناسب للطابعات والكاميرات والسيرفرات.
- blocked: الجهاز محظور ومش هيقدر يسجّل دخول.
- regular: الجهاز يتعامل زي أي جهاز عادي ولازم يسجّل دخول.
وأسهل طريقة: افتح الجهاز من تبويب Hosts واضغط Make Binding.
/ip hotspot ip-binding add mac-address=AA:BB:CC:DD:EE:FF type=bypassed
تحديد السرعة وعدد الأجهزة (User Profiles)
من تبويب User Profiles افتح البروفايل أو اعمل واحد جديد. أهم الخانات:
- Rate Limit (rx/tx): سرعة المستخدم. مثلاً 3M/3M، الرقم الأول للرفع والثاني للتحميل.
- Shared Users: عدد الأجهزة اللي تقدر تدخل بنفس الحساب في نفس الوقت.
- Keepalive Timeout: لو الجهاز اتقفل أو اتفصل عن الشبكة وعدّت المدة دي، الراوتر بيسجّل خروجه تلقائيًا.
/ip hotspot user profile add name=3M rate-limit=3M/3M shared-users=1
بعد كده اختار البروفايل للمستخدم من خانة Profile في تبويب Users.
تحديد وقت وكمية الاستخدام (Limits)
من تبويب Users افتح المستخدم وادخل على تبويب Limits:
- Limit Uptime: إجمالي الوقت المسموح للحساب، وبعدها ما يقدرش يدخل.
- Limit Bytes Total: إجمالي كمية البيانات المسموحة. وتقدر تحدد الرفع لوحده من Limit Bytes In والتحميل لوحده من Limit Bytes Out.
/ip hotspot user add name=user1 password=1234 profile=3M limit-uptime=1h limit-bytes-total=1G
طرق تسجيل الدخول (Login By)
من تبويب Server Profiles افتح البروفايل (hsprof1) وادخل على تبويب Login:
- Cookie: بعد أول تسجيل دخول، الراوتر بيفتكر المتصفح وبيدخّله تلقائيًا لحد ما مدة HTTP Cookie Lifetime تخلص (3 أيام افتراضيًا).
- MAC: الجهاز يدخل تلقائيًا بالماك بتاعه من غير صفحة دخول. اختار MAC as username من MAC Auth. Mode، وهات الماك من تبويب Hosts، واعمل مستخدم جديد في Users اسمه هو الماك نفسه، وكلمة المرور نفس المكتوبة في MAC Auth. Password (فاضية افتراضيًا).
- Trial: الزائر يجرّب الإنترنت من غير حساب. Trial Uptime Limit هي مدة التجربة (30 دقيقة افتراضيًا)، و Trial Uptime Reset هي المدة اللي بعدها يقدر يجرّب تاني (يوم افتراضيًا).
شاهد الشرح الكامل بالفيديو:
لمشاهدة كل الإعدادات دي عمليًا، تقدر تشوف الفيديو ده:
الخطوة الجاية: إدارة المشتركين باليوزر مانجر، الإصدار السادس أو الإصدار السابع.
محتاج حد يظبطهالك؟
لو الشرح محتاج وقت أو شبكتك فيها حالة خاصة، كلمنا وننفذها معاك. ولو عندك سؤال عام، اسأل في الجروب مجاناً.